ॲड. समीर देशपांडे उच्च शिक्षणासाठी लंडनला रवाना; देशपांडे परिवाराच्या नव्या पिढीची विदेशात कर्तृत्वाची भरारी
जळगाव येथील मणियार विधी महाविद्यालयातून कायद्याचे शिक्षण पूर्ण केल्यानंतर ॲड. समीर देशपांडे हे कायद्याच्या उच्च शिक्षणासाठी लंडनला रवाना झाले आहेत. समीरच्या या नव्या शैक्षणिक प्रवासामुळे देशपांडे परिवारात आनंदाचे आणि अभिमानाचे वातावरण निर्माण झाले आहे.
शिक्षण हे केवळ पदवी मिळविण्याचे माध्यम नसून व्यक्तिमत्त्व घडविण्याचा, विचारांना व्यापकता देण्याचा आणि आयुष्याला नवी दिशा देण्याचा मार्ग आहे, असा विश्वास ॲड. जमील देशपांडे यांनी व्यक्त केला. शिक्षणाचा पाया भक्कम असेल, तर स्वप्नांना उंच भरारी घेण्याचे बळ मिळते, हीच शिकवण देशपांडे परिवाराने पुढच्या पिढीला दिली असल्याचे त्यांनी सांगितले.
देशपांडे परिवारातील नव्या पिढीने शिक्षण आणि कर्तृत्वाची सीमा देशाच्या पलीकडे नेली आहे. विदेशात उच्च शिक्षणासाठी झेप घेणारा ॲड. समीर देशपांडे हा परिवारातील तिसरा सदस्य आहे. त्यांचे लहान भाऊ अल्ताफ देशपांडे यांचा मुलगा सध्या जर्मनीमध्ये उच्च शिक्षण घेत आहे, तर दुसरे लहान भाऊ असलम देशपांडे यांची मुलगी विदेशात वैद्यकीय शिक्षण घेत आहे.
याशिवाय मोठे बंधू शकील देशपांडे यांची कन्या आफरीन हिने अवघ्या १४व्या वर्षी ग्रीस येथे झालेल्या आंतरराष्ट्रीय बुद्धिबळ स्पर्धेत सहभाग घेत आंतरराष्ट्रीय नामांकन मिळविले आहे. त्यामुळे देशपांडे परिवाराची नवी पिढी शिक्षण, क्रीडा आणि विविध क्षेत्रांतील कर्तृत्वातून परिवाराचे नाव उज्ज्वल करत असल्याचे ॲड. जमील देशपांडे यांनी नमूद केले.
विशेष म्हणजे, देशपांडे परिवारातील सर्व भावांनी जिल्हा परिषद शाळेत शिक्षण घेतले आहे. साध्या परिस्थितीत मिळालेल्या त्या शिक्षणाने परिस्थिती कोणतीही असो, शिक्षणाचा पाया मजबूत असेल तर पुढची प्रत्येक पायरी अधिक भक्कम करता येते, हा संस्कार दिला. त्यामुळे पुढच्या पिढीने उत्तम शिक्षण घ्यावे, मोठी स्वप्ने पाहावीत आणि आपल्या कर्तृत्वाने ती पूर्ण करावीत, हा परिवाराचा कायमचा संस्कार राहिला आहे.
ॲड. समीर यांच्या लंडनमधील उच्च शिक्षणाच्या प्रवासामागे त्यांची मेहनत आणि जिद्द यासोबतच जळगावच्या मणियार विधी महाविद्यालयातील शिक्षकांचे मार्गदर्शन आणि देशपांडे परिवाराचा भक्कम पाठिंबा असल्याचेही ॲड. जमील देशपांडे यांनी सांगितले.
समीरला निरोप देण्यासाठी मुंबईच्या आंतरराष्ट्रीय विमानतळावर मध्यरात्रीही जळगाव, पुणे आणि मुंबई येथून देशपांडे परिवारातील अनेक सदस्य मोठ्या संख्येने उपस्थित होते. एका मुलाच्या स्वप्नाला संपूर्ण परिवाराने आपले स्वप्न मानून त्याच्या पाठीशी उभे राहणे, हीच खरी कौटुंबिक ताकद असल्याची भावना यावेळी व्यक्त करण्यात आली. 
“ॲड. समीर देशपांडे आपल्या कर्तृत्वाने स्वतःचे, आपल्या परिवाराचे आणि आपल्या जळगावचे नाव उज्ज्वल करेल,” असा विश्वास ॲड. जमील देशपांडे यांनी व्यक्त केला.
समीरला शुभेच्छा देताना त्यांनी लिहिलेल्या चार ओळींमधून त्यांचा मुलाबद्दलचा अभिमान आणि विश्वासही व्यक्त झाला—
“उड़ने के लिए,
अनुमति न मांगें…
ये पंख तुम्हारे हैं,
और आकाश किसी का नहीं है..!”
लंडनमधील नव्या शैक्षणिक प्रवासासाठी ॲड. समीर देशपांडे यांना देशपांडे परिवार आणि जळगावकरांकडून मनःपूर्वक शुभेच्छा देण्यात येत आहेत.
