जळगावच्या एसटी ताफ्यात नव्या ७ ‘राजमाता जिजाऊ’ बसेस दाखल; विभागातील संख्या ७० वर
पालकमंत्री गुलाबराव पाटील यांच्या हस्ते लोकार्पण; “एसटी म्हणजे सामान्य माणसाचा विश्वास, जळगावचा वाटा कमी पडू देणार नाही”
जळगाव, दि. २८ : ग्रामीण भागातील सर्वसामान्य नागरिकांसाठी महत्त्वाची असलेल्या महाराष्ट्र राज्य मार्ग परिवहन महामंडळाच्या (एसटी) सेवेला जळगाव जिल्ह्यात आणखी बळ मिळाले आहे. जळगाव बस आगाराच्या प्रांगणात एसटी महामंडळाच्या सात नव्या ‘राजमाता जिजाऊ’ बसेसचे पालकमंत्री तथा पाणीपुरवठा व स्वच्छता मंत्री गुलाबराव पाटील यांच्या हस्ते पूजन करून लोकार्पण करण्यात आले. नव्या सात बसेस सेवेत दाखल झाल्यामुळे जळगाव विभागातील ‘राजमाता जिजाऊ’ बसेसची संख्या ६३ वरून ७० झाली आहे.
यावेळी बोलताना पालकमंत्री गुलाबराव पाटील यांनी एसटीच्या सेवेचे महत्त्व अधोरेखित केले. “एसटी म्हणजे सामान्य माणसाचा विश्वास आहे. गाव कितीही लहान असो, रस्ता कसाही असो, एसटी त्या माणसापर्यंत पोहोचते,” असे त्यांनी सांगितले. गेल्या काही वर्षांत जळगावच्या एसटी सेवेत मोठे बदल झाले असून इलेक्ट्रिक बसेसनंतर आता ‘राजमाता जिजाऊ’च्या नव्या बसेसही प्रवाशांच्या सेवेत दाखल होत असल्याचे त्यांनी नमूद केले.
जळगावचा वाटा कमी पडू देणार नाही
राज्यात नव्या बसेस टप्प्याटप्प्याने दाखल होत असताना जळगाव जिल्ह्याला अधिकाधिक आधुनिक बसेस मिळाव्यात, यासाठी आपला पाठपुरावा सुरू असल्याचे गुलाबराव पाटील यांनी सांगितले. परिवहन मंत्री प्रताप सरनाईक यांच्याकडे याबाबत सातत्याने पाठपुरावा केला जात असल्याचे त्यांनी स्पष्ट केले.
“राज्यात नव्या गाड्या येत असताना जळगावचा वाटा कमी पडू देणार नाही. जिल्ह्यातील प्रवाशांना चांगली आणि आधुनिक वाहतूक व्यवस्था मिळावी, यासाठी प्रयत्न सुरूच राहतील,” अशी ग्वाही त्यांनी दिली.
महिलांचा एसटीवरील विश्वास वाढला
महिलांना एसटी प्रवासात ५० टक्के सवलत मिळाल्यानंतर महिलांचा एसटीवरील विश्वास आणि प्रवास दोन्ही वाढल्याचे पालकमंत्री पाटील यांनी सांगितले. ‘राजमाता जिजाऊ’ या नावामागील भावनाही त्यांनी स्पष्ट केली.
“जिजाऊंनी शिवरायांना घडवले आणि शिवरायांनी स्वराज्य घडवले. आजही प्रत्येक घर घडवण्यात आईच्या संस्कारांचा मोठा वाटा असतो. त्यामुळे ‘राजमाता जिजाऊ’ हे केवळ बसचे नाव नाही; तर घराघरातील मातृशक्तीला दिलेला सन्मान आहे,” असे ते म्हणाले.
राज्यात सुमारे तीन हजार ‘राजमाता जिजाऊ’ बसेस. 
राज्यात सुमारे तीन हजार ‘राजमाता जिजाऊ’ बसेस टप्प्याटप्प्याने प्रवासी सेवेत दाखल होणार असल्याची माहिती यावेळी देण्यात आली. जळगाव विभागात यापूर्वी ६३ ‘राजमाता जिजाऊ’ बसेस कार्यरत होत्या. नव्या सात बसेस सेवेत दाखल झाल्याने ही संख्या आता ७० झाली आहे.
याशिवाय जळगाव आगारात ३० इलेक्ट्रिक बसेस, तर चोपडा आगारात २० इलेक्ट्रिक बसेस कार्यरत आहेत. त्यामुळे जळगाव विभागातील सार्वजनिक वाहतूक व्यवस्था अधिक आधुनिक करण्याच्या दिशेने पाऊल पडले आहे.
‘गाड्या वाढल्या, आता सेवेचा दर्जाही वाढवा’
नव्या बसेस वाढत असतानाच प्रवाशांना मिळणाऱ्या सेवेचा दर्जाही उंचावण्याची गरज असल्याचे गुलाबराव पाटील यांनी सांगितले. स्वच्छता, सुरक्षितता आणि वेळेचे पालन यावर विशेष भर देण्याची अपेक्षा त्यांनी व्यक्त केली.
“गाडी महामंडळाची असली तरी त्यात बसलेला प्रत्येक प्रवासी आपला माणूस आहे. त्याला सुरक्षित आणि वेळेत पोहोचवणे ही आपली जबाबदारी आहे,” असे पाटील यांनी स्पष्ट केले.
प्रवाशांना चांगली सुविधा मिळण्यासाठी केवळ बसेसची संख्या वाढवणे पुरेसे नसून बसस्थानकांची स्वच्छता, बसेसची नियमित देखभाल, सुरक्षित प्रवास आणि वेळापत्रकाचे काटेकोर पालन यालाही महत्त्व असल्याचे त्यांनी नमूद केले.
अधिकारी-कर्मचाऱ्यांची उपस्थिती
या लोकार्पण सोहळ्यास आमदार सुरेश भोळे, जळगाव महानगरपालिकेच्या महापौर दीपमाला काळे, जळगाव विभागाचे विभाग नियंत्रक प्रज्ञेश बोरसे, यंत्र अभियंता सचिन पवार, आगार व्यवस्थापक संदीप पाटील, विभागीय वाहतूक अधीक्षक मयूर पाटील, कामगार अधिकारी प्रवीण पाटील, सांख्यिकी अधिकारी रवींद्र पवार, सुरक्षा व दक्षता अधिकारी दीपक जाधव, स्थानक प्रमुख राजेश देशपांडे यांच्यासह एसटी महामंडळाचे अधिकारी व कर्मचारी उपस्थित होते.
कार्यक्रमाचे प्रास्ताविक विभाग नियंत्रक प्रज्ञेश बोरसे यांनी केले. प्रसिद्धी सचिव गोपाळ पाटील यांनी सूत्रसंचालन, तर आगार व्यवस्थापक संदीप पाटील यांनी आभार मानले.
जळगावच्या एसटी सेवेला नवे बळ
सात नव्या ‘राजमाता जिजाऊ’ बसेसच्या समावेशामुळे जळगाव विभागातील या बसेसची संख्या ७० वर पोहोचली आहे. इलेक्ट्रिक बसेसच्या सेवेसोबतच नव्या बसेस दाखल झाल्याने जळगाव जिल्ह्यातील ग्रामीण आणि शहरी प्रवाशांना अधिक आधुनिक वाहतूक सुविधा उपलब्ध होण्याची अपेक्षा व्यक्त होत आहे.
