औरंगाबादचं नाव औरंगाबादच राहावं, पुण्याचं नाव छत्रपती संभाजीनगर करावं; सुजात आंबेडकरांची मागणी
पुणे : औरंगाबादच्या नामांतराचा मुद्दा पुन्हा एकदा चर्चेत आला आहे. वंचित बहुजन आघाडीचे नेते सुजात आंबेडकर यांनी औरंगाबादचं नाव ‘औरंगाबाद’च राहावं, तर पुण्याचं नामकरण ‘छत्रपती संभाजीनगर’ करण्यात यावं, अशी मागणी केली आहे. त्यांच्या या वक्तव्यामुळे राजकीय आणि सामाजिक वर्तुळात नव्या चर्चेला सुरुवात झाली आहे.
सुजात आंबेडकर यांनी शहरांच्या नावांमागील इतिहासाचा संदर्भ देत आपली भूमिका मांडली. ज्या शहरात एखाद्या राजाची राजधानी होती आणि ज्या शहरातून त्या राजाने राज्य केलं, त्या शहराशीच संबंधित राजाची ओळख जोडली गेली पाहिजे, असा तर्क त्यांनी मांडला.
पुण्याला छत्रपती संभाजी महाराजांचं नाव दिल्यास पुण्यातील संबंधित सामाजिक घटकांना ते मान्य होईल का, असा सवालही सुजात आंबेडकर यांनी उपस्थित केला. त्यामुळे त्यांच्या या वक्तव्याची राजकीय वर्तुळात चर्चा सुरू झाली आहे.
दरम्यान, सुजात आंबेडकर यांच्या वक्तव्यावर मनसे नेते संदीप देशपांडे यांनी टीका केली आहे. प्रसिद्धीसाठी अशा प्रकारची विधानं केली जात असल्याचा आरोप त्यांनी केला. तसेच नवनाथ बन यांनीही सुजात आंबेडकर यांच्या भूमिकेवर आक्षेप घेत त्यांच्यावर टीका केली आहे.
औरंगाबादचं ‘छत्रपती संभाजीनगर’ नामकरण आणि त्याला होणारा विरोध हा गेल्या काही काळापासून महाराष्ट्रातील चर्चेचा विषय राहिला आहे. आता सुजात आंबेडकर यांच्या नव्या मागणीमुळे या मुद्द्याला पुन्हा राजकीय वादाची किनार मिळण्याची शक्यता आहे.
