जळगाव, प्रतिनिधी : जळगाव लोकसभा मतदारसंघाच्या खासदार स्मिता वाघ यांच्या संसदीय कार्याची राष्ट्रीय पातळीवर पुन्हा एकदा दखल घेण्यात आली आहे. संसदेतील प्रभावी कामगिरी, जनतेच्या प्रश्नांची सातत्याने मांडणी आणि मतदारसंघाच्या विकासासाठी केलेल्या प्रयत्नांची दखल घेत त्यांना ‘संसद रत्न पुरस्कार २०२६’ प्रदान करण्यात आला. विशेष म्हणजे, सलग दुसऱ्या वर्षी त्यांना हा प्रतिष्ठेचा सन्मान मिळाला आहे.
‘संसद रत्न पुरस्कार २०२६’चा हा १६ वा सोहळा असून, यावेळी खासदार स्मिता वाघ यांचा गौरव करण्यात आला. पुरस्कार सोहळ्यात मान्यवरांच्या उपस्थितीत त्यांना सन्मानचिन्ह व प्रमाणपत्र प्रदान करण्यात आले. पुरस्कार स्वीकारताना त्यांच्या चेहऱ्यावरचा आनंद आणि समाधान स्पष्टपणे दिसून आले.
जनतेच्या विश्वासाला समर्पित सन्मान
पुरस्कारानंतर भावना व्यक्त करताना खासदार स्मिता वाघ यांनी हा पुरस्कार केवळ वैयक्तिक गौरव नसून जळगाव लोकसभा मतदारसंघातील जनतेने त्यांच्यावर दाखविलेल्या विश्वासाचा सन्मान असल्याचे सांगितले.
संसदेत जळगाव मतदारसंघातील विविध समस्या, विकासाच्या मागण्या आणि जनहिताचे प्रश्न प्रभावीपणे मांडण्याचा आपण सातत्याने प्रयत्न करत असल्याचे त्यांनी नमूद केले. मतदारसंघातील नागरिकांच्या अपेक्षा आणि समस्या केंद्रस्थानी ठेवून संसदीय कामकाजात आपली भूमिका मांडत असल्याचेही त्यांनी स्पष्ट केले.
“गतवर्षी मिळालेल्या पहिल्या ‘संसद रत्न’ सन्मानाने अधिक जोमाने काम करण्याची प्रेरणा दिली. सलग दुसऱ्यांदा मिळालेल्या या पुरस्कारामुळे जनतेप्रती असलेली जबाबदारी आणखी वाढली आहे,” अशी भावना खासदार स्मिता वाघ यांनी व्यक्त केली.
संसदीय कामगिरीची राष्ट्रीय पातळीवर दखल.
लोकप्रतिनिधी म्हणून संसदेत सक्रिय सहभाग नोंदवणे, विविध विषयांवर प्रश्न उपस्थित करणे आणि मतदारसंघाशी संबंधित विकासाच्या मागण्या केंद्र सरकारसमोर मांडणे या कामगिरीमुळे स्मिता वाघ यांच्या कार्याची दखल घेण्यात आली आहे.
जळगावच्या विविध प्रश्नांना संसदेच्या माध्यमातून व्यासपीठ मिळवून देण्याबरोबरच मतदारसंघातील नागरिकांच्या अपेक्षा केंद्रापर्यंत पोहोचवण्यावर भर असल्याचे त्यांच्या भूमिकेतून दिसून येते. त्यामुळे सलग दुसऱ्यांदा मिळालेला ‘संसद रत्न’ पुरस्कार त्यांच्या संसदीय कामकाजातील सातत्याचे महत्त्व अधोरेखित करणारा ठरला आहे.
मान्यवरांचे मानले आभार.
या सन्मानानंतर खासदार स्मिता वाघ यांनी पंतप्रधान नरेंद्र मोदी, केंद्रीय गृहमंत्री अमित शाह, भाजपचे राष्ट्रीय अध्यक्ष नितीन नबीन, मुख्यमंत्री देवेंद्र फडणवीस, भाजपा प्रदेशाध्यक्ष रवींद्र चव्हाण तसेच जलसंपदा मंत्री गिरीश महाजन यांचे मार्गदर्शन आणि विश्वासाबद्दल कृतज्ञता व्यक्त केली.
तसेच संसद रत्न पुरस्कार समिती, ज्युरी सदस्य, संसदीय सहकारी, भाजप परिवारातील पदाधिकारी व कार्यकर्ते, सहकारी आणि शुभेच्छुक यांचेही त्यांनी आभार मानले.
जळगावमध्ये अभिनंदनाचा वर्षाव
खासदार स्मिता वाघ यांना सलग दुसऱ्यांदा ‘संसद रत्न’ पुरस्कार मिळाल्याची बातमी समोर आल्यानंतर जळगाव जिल्ह्यात त्यांच्या समर्थकांकडून आणि विविध क्षेत्रातील मान्यवरांकडून अभिनंदन करण्यात येत आहे.
राजकीय, सामाजिक, शैक्षणिक तसेच विविध क्षेत्रांतून त्यांच्यावर शुभेच्छांचा वर्षाव होत असून, जळगाव लोकसभा मतदारसंघासाठी हा अभिमानाचा क्षण असल्याची भावना व्यक्त होत आहे.
सलग दुसऱ्यांदा मिळालेल्या या राष्ट्रीय सन्मानामुळे जळगावच्या जनतेच्या प्रश्नांना संसदेत अधिक प्रभावीपणे मांडण्यासाठी खासदार स्मिता वाघ यांना नवी ऊर्जा आणि प्रेरणा मिळणार असल्याचे मानले जात आहे.
