खाऊ गल्लीतल्या हॉकर्सच्या प्रश्नांवर तोडगा काढण्यासाठी मनपा पदाधिकाऱ्यांची पाहणी
जळगाव | प्रतिनिधी : जळगाव शहर महानगरपालिकेला लागून असलेल्या खाऊ गल्लीतील हॉकर्सच्या विविध प्रश्नांबाबत जळगाव शहर हॉकर्स संघटनेच्या पदाधिकाऱ्यांनी आज उपमहापौर मनोज चौधरी यांची भेट घेऊन निवेदन सादर केले. यावेळी हॉकर्सच्या समस्या जाणून घेत त्यांच्या उपजीविकेचा प्रश्न मार्गी लावण्यासाठी सकारात्मक चर्चा करण्यात आली.
निवेदनानंतर उपमहापौर मनोज चौधरी, स्थायी समिती सभापती डॉ. चंद्रशेखर पाटील, नगरसेवक तथा जिल्हाप्रमुख दीपकभाऊ सूर्यवंशी, महानगर सरचिटणीस राहुल पाटील आणि उपायुक्त गोसावी यांच्या उपस्थितीत मनपा परिसरालगत असलेल्या खाऊ गल्लीची प्रत्यक्ष पाहणी करण्यात आली. यावेळी खाऊ गल्लीतील हॉकर्स तसेच विविध हॉकर्स संघटनांचे पदाधिकारी व सदस्य उपस्थित होते.
सन २०१४ पर्यंत नोंदणीकृत असलेले तसेच नोटरीधारक हॉकर्स यांच्याबाबत यावेळी विशेष विचार करण्यात आला. संबंधित हॉकर्सना गोलाणी मार्केटच्या मागील बाजूस उपलब्ध जागेत व्यवस्थितपणे बसविता येईल का, याबाबत मनपा आयुक्तांसोबत बैठक घेऊन योग्य मार्ग काढण्यात येणार असल्याचे सांगण्यात आले.
तसेच हॉकर्सना व्यवसाय करताना टेबल-खुर्च्या न ठेवता केवळ गाड्यांद्वारे व्यवसाय करता येईल का, याबाबतही मनपा प्रशासन, पदाधिकारी आणि हॉकर्स संघटनेच्या पदाधिकाऱ्यांची संयुक्त बैठक घेऊन निर्णय घेण्याचे आश्वासन देण्यात आले.
“हॉकर्सचा व्यवसाय आणि त्यांच्या उपजीविकेचा प्रश्न कायम ठेवत जळगाव शहर स्वच्छ, सुंदर आणि सुव्यवस्थित ठेवण्यासाठी सर्वांनी सहकार्य करणे आवश्यक आहे. प्रशासन आणि हॉकर्स यांच्यात समन्वय साधून योग्य मार्ग काढण्याचा प्रयत्न केला जाईल,” अशी भूमिका यावेळी व्यक्त करण्यात आली.
हॉकर्सच्या उपजीविकेचा प्रश्न आणि शहराच्या स्वच्छतेचा समतोल साधण्यासाठी मनपा प्रशासन व हॉकर्स संघटनांमध्ये समन्वयाने तोडगा निघण्याची अपेक्षा व्यक्त होत आहे.
यावेळी मोहन तिवारी (पथ विक्रेता समिती सदस्य), दिनेश हिंगणे (जळगाव शहर हॉकर्स टपरीधारक संघटना अध्यक्ष), शुभम जाधव (विक्रेता समिती सदस्य) यांच्यासह खाऊ गल्लीतील हॉकर्स बांधव उपस्थित होते.
