दुष्काळाचा आढावा की काजू-बदामाचा सुकाळ? नांदेडच्या बैठकीवर ॲड. जमील देशपांडेंची टीका
नांदेड : महाराष्ट्रातील शेतकरी पावसाच्या प्रतीक्षेत असून अनेक भागांत पिकांची अवस्था बिकट झाली आहे. उत्पादन खर्चात वाढ, पिकांचे नुकसान आणि कर्जाचा वाढता भार अशा विविध समस्यांना शेतकरी सामोरा जात असताना नांदेडमध्ये झालेल्या दुष्काळ आढावा बैठकीतील काजू-बदामाच्या दृश्यावरून आता चर्चा सुरू झाली आहे. या पार्श्वभूमीवर मराठी प्रतिष्ठानचे अध्यक्ष ॲड. जमील देशपांडे यांनी शासनाच्या संवेदनशीलतेवर प्रश्न उपस्थित करत टीका केली आहे.
दुष्काळी परिस्थितीचा आढावा घेण्यासाठी झालेल्या बैठकीत शेतकऱ्यांच्या अडचणी, पिकांचे नुकसान, मदत आणि उपाययोजनांवर ठोस चर्चा होणे अपेक्षित असताना बैठकीतील काजू-बदामाचे दृश्य चर्चेचा विषय ठरल्याचे देशपांडे यांनी म्हटले आहे.
“प्रश्न काजू-बदाम खाल्ले की नाही, एवढाच नाही; प्रश्न संवेदनशीलतेचा आहे,” असे म्हणत देशपांडे यांनी शेतकऱ्यांच्या परिस्थितीकडे लक्ष वेधले. एका बाजूला शेतकरी करपलेले पीक वाचवण्यासाठी धडपडत आहे, तर दुसऱ्या बाजूला दुष्काळाच्या बैठकीतील सुकामेव्याचे दृश्य शेतकऱ्यांच्या मनाला बोचणारे असल्याचे त्यांनी नमूद केले.
शेतकऱ्याला सध्या सुकामेवा नको, तर शेत वाचवण्यासाठी मदत हवी आहे. आश्वासनांपेक्षा पंचनामा, पंचनाम्यानंतर नुकसानभरपाई, पीकविम्याचा दिलासा, जनावरांसाठी चारा आणि पिण्यासाठी पाणी आवश्यक असल्याचे देशपांडे यांनी म्हटले आहे.
दुष्काळाच्या किती बैठका झाल्या यापेक्षा त्या बैठकीनंतर किती शेतकऱ्यांच्या खात्यात प्रत्यक्ष मदत पोहोचली, हे महत्त्वाचे असल्याचेही त्यांनी सांगितले. “काजू-बदामाचा राग नाही; मात्र दुष्काळाच्या काळात शासनाच्या टेबलावर काय आहे, यापेक्षा शेतकऱ्याच्या ताटात काय आहे, हा प्रश्न मोठा आहे,” अशी भूमिका त्यांनी मांडली.
शेतकऱ्याच्या शेतात पाण्याची प्रतीक्षा, ताटात अनिश्चितता आणि डोक्यावर कर्जाचे ओझे असताना दुष्काळाचा दौरा केवळ पाहणीपुरता मर्यादित न राहता शेतकऱ्यांच्या जगण्याला आधार देणारा निर्णय दौरा झाला पाहिजे, अशी मागणी देशपांडे यांनी केली आहे.
“दुष्काळाचा खरा आढावा वातानुकूलित सभागृहात होत नाही; तो करपलेल्या शेताच्या बांधावर होतो,” असे म्हणत ॲड. जमील देशपांडे यांनी दुष्काळग्रस्त शेतकऱ्यांच्या प्रश्नांकडे गांभीर्याने पाहण्याचे आवाहन केले.
