जळगाव:
राजकारणात कोणीच कोणाचा कायमचा शत्रू किंवा मित्र नसतो, असं म्हटलं जातं. याचाच प्रत्यय जळगावमध्ये एका विवाह सोहळ्याच्या निमित्ताने आला. शिवसेना पक्षात फूट पडल्यानंतर गेल्या चार वर्षांपासून एकमेकांचे तोंडही न पाहणारे दोन कट्टर राजकीय विरोधक – खासदार संजय राऊत आणि राज्याचे मदत व पुनर्वसन मंत्री गुलाबराव पाटील – जेव्हा समोरासमोर आले, तेव्हा सर्वांच्याच भुवया उंचावल्या. मात्र, या भेटीत कटुता बाजूला सारून दोन्ही नेत्यांनी एकमेकांना नमस्कार केला, हस्तांदोलन केले आणि विचारपूसही केली.
राजकीय रणांगण सोडून स्मितहास्य
शिवसेनेतील ऐतिहासिक फुटीनंतर दोन्ही गटात कमालीचा संघर्ष पाहायला मिळाला. गेल्या काही वर्षांत संजय राऊत आणि गुलाबराव पाटील यांनी एकमेकांवर बोचरी टीका करण्याची एकही संधी सोडली नव्हती. आरोप-प्रत्यारोपांच्या फैरींमुळे जळगावच्या राजकारणात नेहमीच ठिणग्या उडत असत. मात्र, जळगावमधील या विवाह सोहळ्यात चित्र काहीसे वेगळे दिसले. खासदार संजय राऊत यांनी मंत्री गुलाबराव पाटील यांच्या खांद्यावर हात ठेवून त्यांच्याशी संवाद साधला. यावेळी दोन्ही नेत्यांच्या चेहऱ्यावर स्मितहास्य होते.
पक्षफुटीची धग आता शांत?
गेल्या चार वर्षांपासून दोन्ही गटातील नेत्यांमधील संवाद पूर्णपणे तुटला होता. सार्वजनिक कार्यक्रमातही हे नेते एकमेकांकडे पाठ फिरवत असत. मात्र, आता पक्षफुटीची धग काहीशी शांत झाल्याचे या भेटीवरून दिसून येत आहे. या अनपेक्षित भेटीचे फोटो आणि व्हिडिओ सध्या सोशल मीडियावर तुफान व्हायरल होत आहेत.
‘दुरावलेले मित्र जेव्हा एकत्र येतात…’
हे दोन्ही नेते एकेकाळी एकाच पक्षात अत्यंत जवळचे सहकारी म्हणून ओळखले जात होते. या भेटीचे फोटो पाहून सोशल मीडियावर नेटकऱ्यांकडून विविध प्रतिक्रिया येत आहेत. “दुरावलेले मित्र जेव्हा पुन्हा एकत्र येतात, तेव्हा राजकारण दुय्यम ठरते,” अशा भावना अनेक नागरिक व्यक्त करत आहेत. राजकीय रणांगणात जरी संघर्ष असला, तरी सामाजिक आणि वैयक्तिक आयुष्यात जपलेली ही सभ्यता जळगावकरांच्या चर्चेचा विषय ठरली आहे.
या भेटीमुळे आगामी काळात राजकीय समीकरणे बदलतील का? की ही केवळ एक औपचारिक भेट होती? हे पाहणे आता औत्सुक्याचे ठरेल.
About the Author
