जळगाव: जळगाव महानगरपालिकेचे उपमहापौर मनोज सुरेश चौधरी यांनी शुक्रवारी आरोग्य विभागाची बैठक घेऊन ‘कामात हलगर्जीपणा खपवून घेणार नाही’ असा सज्जड दम दिला. मात्र, या आदेशाची शाई वाळते न वाळते, तोच महाबळ कॉलनीतील भीषण वास्तव समोर आले आहे.
एकीकडे बैठकांमध्ये स्वच्छतेचे दावे केले जात असताना, दुसरीकडे मोठ्या अधिकाऱ्यांच्या बंगल्यासमोरच कचऱ्याचे डोंगर साचले आहेत. यामुळे प्रशासनाचे आदेश फक्त एसी केबिनपुरतेच मर्यादित आहेत का? असा प्रश्न नागरिक विचारत आहेत.
आदेश कडक, पण अंमलबजावणी शून्य!
उपमहापौरांनी बैठकीत स्पष्ट सूचना दिल्या होत्या की, शहरातील कचरा वेळच्या वेळी उचलला गेला पाहिजे. परंतु:
महाबळ कॉलनीतील परिस्थिती: जिल्हा परिषदेच्या सीईओ मीनल करणवाल आणि सिविल सर्जन डॉ. किरण पाटील यांच्या बंगल्यांसमोर गेल्या तीन दिवसांपासून कचरा तसाच पडून आहे.
दुर्गंधीचे साम्राज्य: ‘स्वच्छ व सुंदर जळगाव’च्या घोषणा दिल्या जात असताना, प्रत्यक्षात उच्चभ्रू वस्तीतही नागरिक दुर्गंधीमुळे हैराण आहेत.
बोगस हजेरीचे काय?
उपमहापौरांनी ‘बोगस हजेरी’ रोखण्यासाठी स्वच्छता निरीक्षकांना स्वतः हजेरी घेण्याचे आदेश दिले आहेत. जर कर्मचारी कागदावर हजर असतील, तर मग महाबळ परिसरातील ही कचराकुंडी रिकामी का झाली नाही? कर्मचाऱ्यांच्या हजेरीचा घोळ आजही कायम आहे का, असा संशय स्थानिक रहिवासी व्यक्त करत आहेत.
स्थानिकांचा संताप: “अतिक्रमण काढता, कचरा कधी काढणार?”
“महानगरपालिका हॉकर्सवर कारवाई करण्यात तत्परता दाखवते, पण ओसंडून वाहणाऱ्या कचराकुंड्यांकडे त्यांचे लक्ष का जात नाही? उपमहापौरांचे आदेश जर अधिकारी जुमानत नसतील, तर सामान्य जनतेने दाद कोणाकडे मागायची?” असा संतप्त सवाल महाबळ परिसरातील रहिवाशांनी उपस्थित केला आहे.
About the Author
