शेंगोळा यात्रेत सर्रास अवैधधंदे – बंदोबस्ताला असलेल्या पोलिस कर्मचाऱ्यांचाच आशीर्वाद?
जामनेर तालुक्यातील शेंगोळा येथे भरलेल्या सालाबादप्रमाणे यात्रेवर यंदा अवैध धंद्यांचा शिक्का बसल्याची तीव्र नाराजी व्यक्त होत आहे. मनोरंजनासाठी ओळखली जाणारी ही यात्रा सट्टा, पत्त्याचे क्लब आणि अवैध दारूविक्रीने अक्षरशः पछाडली आहे. दिवसभर उघडपणे सुरू असलेल्या या गैरव्यवहारामुळे यात्रेची ओळख मलिन झाली आहे.
विशेष म्हणजे, परिसरात पोलिसांचा बंदोबस्त असतानादेखील हे धंदे उघडपणे सुरू राहणे हा सर्वात मोठा सवाल आहे. स्थानिकांमध्ये “पोलिसांच्या आशीर्वादाशिवाय हे शक्यच नाही” अशा चर्चा मोठ्या प्रमाणात रंगत आहेत. त्यामुळे कायद्याचा धाक संपल्याची भावना नागरिकांत पसरत आहे.
गेल्या काही वर्षांत मनोरंजनामुळे प्रसिद्ध असलेली शेंगोळा यात्रा आता अवैध धंद्यांच्या अड्ड्यात रूपांतरित होत चालली आहे. यासाठी यात्रा आयोजक समिती तसेच स्थानिक पोलिस प्रशासन दोन्हींची जबाबदारी ठळकपणे समोर येत असल्याचे बोलले जात आहे.
या उघडपणे चालणाऱ्या धंद्यांवर कारवाई टाळली जाते का? वरिष्ठ अधिकाऱ्यांचे लक्ष याकडे जाईल का? आणि सर्वात महत्त्वाचा प्रश्न—यात्रेची प्रतिष्ठा पुन्हा कधी बहाल होणार?
स्थानिक नागरिकांनी आता याचे उत्तर मिळेपर्यंत शांत न बसण्याचा इशारा दिला आहे.
About the Author
