वाढदिवसाचा खर्च टाळून १.७१ लाखांची सामाजिक मदत; जळगावातील युवा उद्योजकांचा आदर्श उपक्र
जळगाव (प्रतिनिधी) : सध्याच्या काळात वाढदिवसानिमित्त फ्लेक्स-बॅनर्स, डीजे, महागडे केक आणि पार्ट्यांवर मोठ्या प्रमाणात खर्च केला जातो. मात्र, या दिखाव्याच्या प्रवाहाला छेद देत जळगावातील दोन युवा उद्योजकांनी आपल्या वाढदिवसानिमित्त सामाजिक बांधिलकी जपत एक प्रेरणादायी आदर्श निर्माण केला आहे.
अयांश ऑटोचे संचालक यश सुनील मंत्री आणि युवा उद्योजक अमोल कासट यांनी वाढदिवसावरील अनावश्यक खर्च टाळून सामाजिक क्षेत्रात कार्यरत असलेल्या ‘जीपीएस मित्र परिवार’ संस्थेला तब्बल १ लाख ७१ हजार रुपयांची आर्थिक मदत दिली. यामध्ये यश मंत्री यांनी ७१ हजार रुपये, तर अमोल कासट यांनी १ लाख रुपये संस्थेचे सर्वेसर्वा तथा माजी जिल्हा परिषद सदस्य प्रतापराव पाटील यांच्याकडे सुपूर्द केले.
वाढदिवस साजरा करण्यासाठी होणारा खर्च समाजहितासाठी वापरण्याचा निर्णय घेतल्याने या उपक्रमाचे सर्वत्र कौतुक होत आहे. यावेळी बोलताना, अनावश्यक पार्ट्या आणि दिखाव्यापेक्षा गरजू, अनाथ आणि वंचित घटकांना मदत केल्याने मिळणारे समाधान अधिक मौल्यवान असल्याची भावना व्यक्त करण्यात आली.
या निधीच्या माध्यमातून ‘जीपीएस मित्र परिवार’तर्फे विविध समाजोपयोगी उपक्रम राबविण्यात येणार आहेत. यामध्ये गरीब व अनाथ विद्यार्थ्यांना वह्या, पुस्तके व शालेय साहित्य वाटप, शैक्षणिक शुल्कासाठी मदत, अनाथाश्रमातील मुलांना अन्नधान्य व कपड्यांचे वितरण, वृद्धाश्रमातील ज्येष्ठ नागरिकांसोबत वेळ घालवून त्यांना आधार देणे, वृक्षारोपणाद्वारे पर्यावरण संवर्धन तसेच रक्तदान शिबिरे आणि मोफत आरोग्य तपासणी शिबिरांचे आयोजन आदी उपक्रमांचा समावेश आहे.
आपला वाढदिवस अत्यंत साधेपणाने साजरा करत समाजकार्यासाठी एवढी मोठी मदत करणाऱ्या यश सुनील मंत्री आणि अमोल कासट यांचे विविध स्तरांतून अभिनंदन होत आहे. त्यांच्या या उपक्रमामुळे समाजातील गरजू घटकांना मोठा आधार मिळणार असून इतर युवकांसाठीही हा एक प्रेरणादायी आदर्श ठरणार आहे.
‘जीपीएस मित्र परिवार’च्या वतीने दोन्ही युवा उद्योजकांना वाढदिवसाच्या शुभेच्छा देत त्यांच्या पुढील वाटचालीसाठी शुभेच्छा व्यक्त करण्यात आल्या.
